నిత్యమూ పాటించవలసిన ధర్మసూక్ష్మాలు
- తల్లిదండ్రులకు నిత్యం నమస్కరించడాన్ని మించిన ధర్మం, నిత్య అన్నదానం చేయడం కంటే మించిన పుణ్యం ఈ సృష్టిలోనే లేవు. జన్మనిచ్చిన తల్లిదండ్రులను దైవంలా పూజించాలి.
- భోజనం చేసేటప్పుడు తూర్పు, ఉత్తర దిక్కులవైపు కూర్చొని మాత్రమే భోజనం చేయాలి. అన్నమును దూషించరాదు, అన్నం పెట్టేవారిని ఎట్టి పరిస్థితుల్లో తిట్టరాదు.
- ఉదయం నిద్రనుండి లేవగానే ముందుగా అరచేతులను చూసుకొని దైవనామస్మరణ చేయాలి.
- ఎంగిలి ఆకులు ఎత్తిన వారికి అన్నదానం చేసిన వారి కంటే ఎక్కువ పుణ్యం వస్తుంది.
- ఏ వస్త్రాలనయినా ధరించి భోజనం చేశాక, వాటితో దైవపూజలో కూర్చోరాదు. వాటిని ఉతికి ఆరవేసిన పిదప వాటిని ధరించి పూజ చేసుకోవచ్చు.
- ప్రదక్షిణలు చేయునపుడు, మంత్ర పుష్పం చదివేటపుడు కింద నేలపై నిలబడాలి.
- దీపాన్నినోటితో ఆర్పరాదు.
- అసలు దేవాలయమే లేని ఊరిలో భోజనం చేయరాదు. శివర్చనును స్త్రీలు కూడా చేయవచ్చు.
- ఒకరు ధరించిన చెప్పులు, వస్త్రాలు ఇంకొకరు ధరించరాదు. కూర్చొని తొడలు, కాళ్ళు ఊపరాదు. అలా ఊపినవాడు వచ్చే జన్మలో కుంటివాడై పుడతాడు. ఒకరు తీసివేసిన జందెం మరొకరు ధరించరాదు.
- ఎంగిలి చేత్తో ఏ పదార్థాన్ని చూపించరాదు. భోజన సమయంలో మాట్లాడుట, నవ్వుట చేయరాదు. నిలబడిఅన్నం తినటం వల్ల క్రమంగా దరిద్రుడౌతాడు. ఒళ్ళో కంచం పెట్టుకొని ఏ పదార్థాలు తినరాదు.
- పండితులకు, గురువులకుతల వెంట్రుకలతో కూడిన అన్నం పెట్టరాదు. భోజనానికి ముందు, తిన్న తర్వాత కూడా కాళ్ళు కడుక్కోవాలి.
- పాపాత్ముల ఇంటి భోజనం చేయరాదు. గిన్నె మొత్తం తుడుచుకొని తినుట, భోజనసమయంలో వేదములు చదవరాదు.
- అసత్యం పలికే వాడితోగాని, భర్తను ఎప్పుడు తిట్టే స్త్రీతోగాని, శత్రువుతో గాని, పిసినిగొట్టుతోగాని కలిసి భోజనం చేయటం మహాపాపం.
- ప్రతిరోజూ స్నానం చేసి వంట చేయవలేను. అలా చేయనిచో ఆ అన్నం తినరాదు. పురాణాలు, ఇతిహాసాలు చెప్పే వ్యక్తి సర్వోత్తముడు. వారిని ఎన్నడూ నిందించరాదు. పురాణాలు, ఇతిహాసాలు దానం చేస్తే వారు గొప్ప విద్యావేత్తలు అవుతారు.
- తల్లిని బిడ్డను వేరుచేయుట, రాత్రి నిద్రిస్తున్నవారిని అనవసరంగా లేపుట, పురాణకథలు వింటున్నప్పుడు విఘ్నం కలిగించుట, భార్యాభర్తలను వేరుచేయుట - బ్రహ్మహత్యాపాతకాలతో సమానం.
- సోళ్ళు, జొన్నలు, వెల్లుల్లి, ఉల్లి పుణ్య కార్యాలు చేయునప్పుడు ఉపయోగించరాదు. చద్ది(నిల్వఉన్న) పదార్థాలు తినరాదు.
- ఆత్మహత్య చేసుకోవడం మహాపాపం. అలా చేసుకున్నవారు కొన్నివేల జన్మలు పిశాచాలుగా, వికలాంగులుగా పుడతారు.
- పుష్కర నదీస్నానము చేయునపుడు వస్త్రము ధరించి (కండువాతో) మాత్రమే స్నానం చేయవలెను. నదీస్నానం సంకల్పం చేసి చేయవలెను. అలా సంకల్పం చేయకుంటే సాదారణంగా ఇంటిలో స్నానం చేసినట్లే. నదీస్నాన ఫలితంరాదు. నదిలో చీమిడి చీదుట, ఉమ్ముట, చిల్లర డబ్బులు వేయుట దోషం.
- తులసి చెట్టు నుండి ఆదివారం, శుక్రవారం, మంగళవారాలలో ఆకులు కోయరాదు. చీకటి పడ్డాక చెట్ల ఆకులు, పువ్వులు కోయరాదు.
- నిజం తెలుసుకోకుండా ఎవరినీ నిందించరాదు. అలా చేస్తే అవతలి వారి పాపాలన్నీ నిందించిన వారి తలకు చుట్టుకుంటాయి.
- ఎవరయినా శవాన్ని తమ ఇంటి దగ్గర ఉండటానికి అనుమతినిచ్చినా, శవాన్ని స్మశానం దాకా మోసినా వారికి స్వర్గం ప్రాప్తిస్తుంది.
- దానం చేస్తానని వాగ్దానం చేసి దానమివ్వనివాడు వందజన్మలు దరిద్రుడై పుడతాడు. వాక్ భంగం చాలా దోషం,
- మంచి మగనితో తాళికట్టించుకొన్నభార్య కాపురం చేయక ఏడిపించటం, మాట వినకపోవటం చేయరాదు. ఇలా చేసిన స్త్రీలకి తదుపరి జన్మలలో వైధవ్యం కానీ, అసలు పెళ్లి కాకపోవడం జరుగుతుంది.
- ఒకసారి వెలిగించాక దీపం వత్తిని తీసివేసి మరల క్రొత్త వత్తిని వేసి మాత్రమే దీపారాధన చేయాలి. దీపారాధనకు ఒక కుంది మాత్రమే వాడితే మూడు వత్తులు వేయాలి. దీపారాధనకు అగ్గిపెట్టె వాడకూడదని ఏ శాస్త్రాలలోనూ చెప్పలేదు. దీపాలు పెట్టేవేళ తలదువ్వుకోరాదు. తలమీద రెండు చేతులు ఒకేసారి పెట్టుకొనరాదు.
- గురువుగారు, పిల్లనిచ్చిన మామగారు, అన్నగారు - ఈ ముగ్గురు కన్నతండ్రితో సమానం.
- ఒక చెట్టును నరకాలంటే ముందుగా పది మొక్కలు నాటాలి.
- సంతోషంగా వుంటే ఐశ్వర్యం ఏడవటంవల్ల దారిద్య్రం లభిస్తాయి.
- తనను తాను చీటికి మాటికి నిందించుకొనుట, తక్కువ చేసుకొనుట, అవమానించుకొనుట చేయరాదు. చీటికి మాటికి ఒట్టు పెట్టుట ప్రతిజ్ఞలు చేయుట దోషం. గోళ్ళుకొరుకుట, నోట్లో వ్రేళ్ళు పెట్టుకొనుట చేయరాదు.
- దేవాలయం నీడను, దేవతల నీడను, గోబ్రాహ్మణుల నీడను, యజ్ఞం చేసే వారి నీడను, దాటరాదు.
- ఈశాన్యం అనగా ఈశ్వరస్థానం. ఈశాన్యంలో దేవతా విగ్రహాలు, చెట్లు ఉండగా వాటిని వాస్తు పేరుతో బరువులుగా భావించి తీసివేసేవారు, అలా తీసివేయమని సలహా ఇచ్చేవారు రాబోయే ఏడు జన్మలు ఉబ్బసపు రోగులుగా పుడతారు. ఈ పనులు చేయుట దైవద్రోహం.
- తల్లిదండ్రులపై, గురువుపై చేయి ఎత్తరాదు. వారికి పెట్టకుండా ఏ పదార్థాలు తినరాదు. వారిని వృద్ధాశ్రమాలలో వుంచారాదు.
- రావి చెట్టుకు పూజించుట, మేడి చెట్టుకు ప్రదక్షిణ చేయుట, వేప చెట్టును నాటుట, మామిడి పళ్ళును దానం చేయుట - అశ్వమేథ యాగ ఫలితాన్ని ఇస్తాయి.
- తీర్థం తీసుకున్నాక, ఆ చేతిని కడుక్కోవాలి తప్ప, అ ఎంగిలి అరచేతిని తలపై రాసుకొనరాదు.
- పాడయిపోయిన దేవుని పటాలుగాని విగ్రహాలుగాని బయట పారవేయరాదు. కాలువలో గాని, చెరువులో గాని, సముద్రంలో గాని కలుపవలెను. అలా కుదరకపోతే ఒక గొయ్యి తీసి అందులో పాతిపెట్టవలెను.
- కాలినడకన పుణ్యక్షేత్రాలు దర్శిస్తే మంచి జన్మలు కలుగుతాయి. శివాలయంలో నందికి దగ్గరగా దీపారాధన చేయరాదు. ఉపవాసం, జాగరణ చేస్తున్నపుడు, ఇతరుల దోషాలు తలుచుకోరాదు.
- ఉత్తర, పశ్చిమ దిక్కల వైపు తల పెట్టి నిద్రించరాదు. తూర్పు, దక్షిణ దిక్కుల తల పెట్టి మాత్రమే నిద్రపోవాలి.
- పుత్రుడు జన్మించిన వార్త వినగానే తండ్రి కట్టుబట్టలతో స్నానం చేయాలి. ఒకవేళ ఆ పుత్రుడు మరణించినట్లైతే తండ్రితోపాటు ఆ కుటుంబమంతా కట్టుబట్టలతో స్నానం చేయాలి.
- కొబ్బరికాయ కొట్టాక వెనుకవైపు పీచు తీయాలనే నియమం కూడా తప్పనిసరి కాదు. కొబ్బరికాయను పీచు తీశాక మళ్ళీ నీళ్ళతో కడగరాదు.
- పండితులకు ఆకులలో లేదా మనం వాడని (క్రొత్తవి) పాత్రలలోకాని మాత్రమే ఆహారం పెట్టాలి.
- స్వయంపాకం అష్టమి, పూర్ణిమ, చతుర్థశి కాలలో ఎవరికయినా దానం చేస్తే దానమిచ్చిన వారికి ఎన్నటికీ అన్నపానాలకు లోటుండదు.
- మంత్రోపదేశం చేసినవారిని మాత్రమే గురువు అంటారు. (ఇతర విద్యలు నేర్పినవారు కేవలం అధ్యాపకులు మాత్రమే)
- గృహ నిర్మాణ మొదలు పెట్టిన ఏడాదిలోపు గాని, గృహప్రవేశ కాలంలో గాని ఆ ఇంట మణిద్వీప వర్ణన పరాయణం చేయడం ఎంతో మంచిది.
- తలకి నూనె రాసుకొని ఆ చేతులతో కాళ్ళకు, వొంటికి ఆ జిడ్డు పులమరాదు.
- సకల పురాణేతిహాస కోవిదుని వద్దనే మంత్రోపదేశం పొందవలెను.
- శుక్రవారం, శనివారం వంటి వార నియమాలు పెట్టుకున్నవారు హోటలు టిఫిన్లు చేయుట, ఆరోజు తినే అల్పహారాల్లో ఉల్లి వాడుట - నిషేదము. ప్రయాణంలో ఉన్న వారికి ఇది వర్తించదు.
- మన ఇంటికి గురువుగారు వచ్చినపుడు లేచి నిలబడి ఎదురుగావెళ్ళి, లోపలికి గౌరవంగా తీసుకొని వచ్చి, కూర్చోబెట్టి మంచినీరు ఇవ్వకుండా మాట్లాడరాదు. గురువుగారు బయలుదేరునపుడు బయటకు వచ్చి, కొంచెం దూరం వారిని అనుసరించి సాగానంపాలి.
- చీటికి, మాటికి యజ్ఞోపవీతం తీసి పక్కనపెట్టడం, తాళి తీసేస్తుండటం - రెండూ భయంకర దోషాలే.
- జపమాలను మెడలో వేసుకొనరాదు. మెడలో వేసుకొన్నమాలతో జపం చేయరాదు.
- బంగారం దొరికితే దానిని ఇంట్లోకి దాచుకోవడం లేదా ధరించడం మంచిదికాదు. దొరికిన బంగారాన్ని దానం చేయాలి, లేదా దేవాలయంలో ఇచ్చివేయాలి.
- శ్రాద్దములో భోక్తగా మిత్రుడు పనికిరాడు. కేవలం అతిథులుగా భోజనం పెట్టుకొనవచ్చు.
- మంత్రోపదేశం చేసిన గురువు భోజనానికి పిలిస్తే వెళ్ళని వానికి ఏనాటికీ మోక్షంరాదు.
- బంధువులలో కానీ, సన్నిహితులలో ఎయవరాయినా మరణించిన వార్త గాని, పురిటి వార్త గాని వినగానే కట్టుబట్టలతో స్నానం చేయాలి.
- ఎట్టి పరిస్థితులలో అబద్ధములు ఆడరాదు. ఎల్లప్పుడూ సత్యమునే పలుకవలెను.
- భుజాలమీదుగా వస్త్రం లేకుండా దైవపూజ చేయరాదు, భోజనం చేయకూడదు. అన్నము తిన్న పళ్ళెంలో చేయి కడుక్కోరాదు. ఓకవేళ కడిగితే, ఆ చేతిని విదల్చరాదు.
- తడి కాళ్ళతో భోజనం చేయరాదు. తడిసిన బట్టల నీళ్ళు ఇతరులపై పడేట్లు విదిలించరాదు. గోళ్ళుకొరుకుట, నోట్లో వ్రేళ్ళు పెట్టుకొనుట చేయరాదు. ఏడుస్తూ అన్నం తినరాదు.
- గుడికి వెళ్ళేటప్పుడుగాని, పురాణం వినటానికి వెళ్ళేటప్పుడుగాని, గురువు గారి దర్శనానికి వెళ్ళేటప్పుడుగాని, చిన్న పిల్లల్ని చూడ్డానికి వెళ్ళేటప్పుడుగాని, అనారోగ్యంతో ఉన్నవారి దగ్గరికి వెళ్ళేటప్పుడుగాని, ఖాళీ చేతులతో వెళ్ళరాదు. ఏదో ఒకటి తప్పకుండా తీసుకువెళ్లాలి.
- ధ్వజస్తంభం లేదా దేవాలయపు గోపురం నీడ పడిన ప్రదేశంలో నివాసం ఉండకూడదు.
- కాలిబొటనవేలిని నేలకి రాయకూడదు. కొంతమంది కాలిబొటన వేలును నేలకు రాస్తూ సిగ్గుపడతారు. బొటన వేలు నందలి నరాలతో గర్భానికి, హృదయానికి రక్తం సరఫరా ఉంటుంది. వాటిపై ఒత్తిడి తేవడం ఆరోగ్యరీత్య అంత మంచిది కాదు.
- స్వామికి వెలిగించే దీపం నూనెతో వెలిగిస్తే ఎడమవైపు అంటే మనకు కుడివైపు , అదే ఆవు నెయ్యితో అయితే స్వామి కుడివైపున, అనగా మనకి ఎడమవైపుగా వెలిగించాలి. దీపపు వత్తులు తూర్పు, ఉత్తరం వైపు ఉంచాలి. మిగతా రెండు దిక్కులు దీపారాధనకు పనికి రావు. స్వామివారికి రెండు వైపులా దీపాలు వెలిగిస్తే అసలు సమస్యేలేదు.
- దేవాలయంలో స్వామి ముందు సాష్టాంగ నమస్కారం చేయరాదు. ధ్వజస్తంభానికి అవతల చేయాలి. గృహంలో పూజాదికాలు పూర్తయ్యాక పురుషులు స్వామికి సాష్టాంగ నమస్కారం చేయాలి. ఆడ వారు మాత్రం మోకాలి పై వంగి నమస్కారం చేయాలి.
- శుక్రవారం లక్ష్మీదేవి , సరస్వతీదేవి , గణపతి పూజలు ఏమిచేసిన పూజ చేస్తున్నప్పుడు ఆవాహన చేయాలి గాని , పూజానంతరం ఉద్వాసన చేయరాదు.
- సకల పూజ ద్రవ్యములను పూజా సమయంలో దక్షిణ భాగం వైపు మాత్రమే ఉంచుకోవాలి.
- ఇంట్లో చెట్టే కదా అని చెట్టుకు పూసిన పువ్వులన్నీ కోయకూడదు. పూలు లేని చెట్టుని చూడకూడదు.
- స్టీలు వంటి పళ్ళెములలొ పూజ ద్రవ్యములు ఉంచుట, అక్షింతలు కలుపుట, గౌరీదేవిని తయారుచేయుట చేయకూడదు.
- ఒకేసారి డబ్బా నిండా అక్షింతలు చేసుకొని అవే వాడకూడదు.ఏరోజు పూలు ఆ రోజు వాడినట్టుగా అక్షింతలను వాడాలి.
- మన గృహంలో ఏ దేవతా విగ్రహమయినా రెండు అంగుళాలు మించి ఉండకపోతే మంచిది. ఆ ఎత్తు దాటితే మీరు చేసేటువంటి పూజలు దేవతామూర్తులకు తృప్తినివ్వవు. దానివల్ల దుష్పరిణామాలు ఎదుర్కోవలసి వస్తుంది.
- కుంకుమ పూజ చేస్తున్నప్పుడు ఆ కుంకుమ అమ్మవారి ముఖం మీద పడేలా పూజ చేయకూడదు.
- శ్రీ మహలక్ష్మి దేవిని, అమ్మవారి అంశ గల వారిని, లక్ష్మి దేవి ప్రియనాధుడు అయిన శ్రీమహావిష్ణువుని మందార పుష్పాలతో పూజిస్తే, శ్రీ మహలక్ష్మి ఆశీర్వాదం కూడా లభిస్తుంది.
- జంటఫలాలను తినటం వలన, స్వామికి అర్పించటం వలన , ఎలాంటి దోషము రాదనీ శాస్రాలు చెబుతున్నాయి.
- తాంబూలంలో జంట అరటిపండును పెట్టకూడదు. దానికి కారణం ఆ జంట అరటిపండ్లు ఏకఫలమని భావము.
0 కామెంట్‌లు